ಸಾಮಾನ್ಯ ಜ್ಞಾನ ಮತ್ತು ಪ್ರಚಲಿತ ವಿದ್ಯಮಾನ ಕ್ವಿಜ್- ಡಿಸೆಂಬರ್,16, 2016

ಟಾಟಾ ಸನ್ಸ್ ನ ಹಂಗಾಮಿ ಅಧ್ಯಕ್ಷರಾದ ರತನ್ ಟಾಟಾ ರವರಿಗೆ ಇಂಡಿಯನ್ ಕೌನ್ಸಿಲ್ ಆಫ್ ಪುಡ್ ಅಂಡ್ ಅಗ್ರಿಕಲ್ಚರ್ (ICAF)ನ 2016 ಜಾಗತಿಕ ಕೃಷಿ ನಾಯಕತ್ವ ಪ್ರಶಸ್ತಿಯನ್ನು ನೀಡಲಾಗಿದೆ. ಮಹಾರಾಷ್ಟ್ರದ ಮುಂಬೈನಲ್ಲಿ ನಡೆದ ಸಮಾರಂಭದಲ್ಲಿ ಪ್ರಶಸ್ತಿಯನ್ನು ಪ್ರಧಾನ ಮಾಡಲಾಯಿತು. ತಮ್ಮ ಎರಡು ದಶಕಗಳ ಅವಧಿಯಲ್ಲಿ ಟಾಟಾ ಸನ್ಸ್ ಸಂಸ್ಥೆಯನ್ನು ಜಾಗತಿಕ ಮಟ್ಟದಲ್ಲಿ ಕೊಂಡಯ್ಯುವಲ್ಲಿ ರತನ್ ಟಾಟಾ ರವರು ನೀಡಿರುವ ಕೊಡುಗೆಯನ್ನು ಗಮನಿಸಿ ಈ ಪ್ರಶಸ್ತಿಯನ್ನು ನೀಡಲಾಗಿದೆ.

ಫೋರ್ಬ್ ನಿಯತಕಾಲಿಕೆಯ “2016ನೇ ಸಾಲಿನ ವಿಶ್ವದ ಅತ್ಯಂತ ಪ್ರಭಾವಶಾಲಿ ವ್ಯಕ್ತಿಗಳ ಪಟ್ಟಿಯಲ್ಲಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅಗ್ರಸ್ಥಾನದಲ್ಲಿದ್ರೆ, ಎರಡನೇ ಸ್ಥಾನ ಅಮೆರಿಕದ ನೂತನ ಅಧ್ಯಕ್ಷರಾಗಿ ಆಯ್ಕೆಯಾಗಿರುವ ಡೊನಾಲ್ಡ್ ಟ್ರಂಪ್ ಅವರ ಪಾಲಾಗಿದೆ. ಪುಟಿನ್ ಸತತ ನಾಲ್ಕನೇ ಬಾರಿ ಮೊದಲ ಸ್ಥಾನದಲ್ಲಿ ಕಾಣಿಸಿಕೊಂಡಿರೋದು ವಿಶೇಷ. ಒಟ್ಟು 74 ಪ್ರಭಾವಶಾಲಿ ನಾಯಕರನ್ನು ಫೋರ್ಬ್ಸ್ ಪಟ್ಟಿ ಮಾಡಿದೆ. ಪ್ರಧಾನಿ ನರೇಂದ್ರ ಮೋದಿ ವಿಶ್ವದ 10 ಪ್ರಭಾವಶಾಲಿ ನಾಯಕರಲ್ಲಿ ಒಬ್ಬರು. ಈ ಪಟ್ಟಿಯಲ್ಲಿ ನಮೋಗೆ 9ನೇ ಸ್ಥಾನ ಲಭಿಸಿದೆ.

2016 ದಿ ಎಕಾನಮಿಕ್ ಟೈಮ್ಸ್ ಏಷ್ಯನ್ ಬ್ಯುಸಿನೆಸ್ ಲೀಡರ್ ಸಮಾವೇಶ ಮಲೇಷಿಯಾದ ಕೌಲಲಾಂಪುರದಲ್ಲಿ ಡಿಸೆಂಬರ್ 14-15 ರಂದು ನಡೆಯಿತು. ಜಾಗತಿಕ ಮಟ್ಟದಲ್ಲಿ ಏಷ್ಯಾ ವಲಯವನ್ನು ವ್ಯವಹಾರ ಸ್ನೇಹಿಯನ್ನಾಗಿಸುವುದು ಈ ಸಮಾವೇಶದ ಉದ್ದೇಶ. ಸಮಾವೇಶದಲ್ಲಿ ಏಷ್ಯಾ ಮತ್ತು ಜಗತ್ತಿನ 400 ಕ್ಕೂ ಹೆಚ್ಚು ಸಿ ಮಟ್ಟದ ಕಾರ್ಯನಿರ್ವಾಹಕ ಅಧಿಕಾರಿಗಳು ಸಮಾವೇಶದಲ್ಲಿ ಭಾಗವಹಿಸಿದ್ದರು.

ಬ್ರೆಜಿಲ್ ನ ರಿಯೋ ಡಿ ಜನೈರೊ ನಗರವನ್ನು ಅಧಿಕೃತವಾಗಿ ವಿಶ್ವ ಪರಂಪರಿಕ ಪಟ್ಟಿಗೆ ಸೇರ್ಪಡೆಗೊಳಿಸಲಾಗಿದೆ. ರಿಯೊ ಡಿ ಜನೈರೊ ನಗರಕ್ಕೆ ಯುನೆಸ್ಕೊ ಮಾನ್ಯತೆಯನ್ನು 2012ರಲ್ಲಿ ನೀಡಲಾಗಿತ್ತು. ಆದರೆ ಬ್ರೆಝಿಲ್ ನ ಅಧಿಕಾರಿಗಳು ಫ್ಲೆಮೆಂಗೊ ಪಾರ್ಕ್, ಶುಗರ್ ಲೋಫ್ ಪರ್ವತ, ಕೊರ್ಕವಡೊ, ಕೊಪಕಬಾನ ಸಮುದ್ರ, ಬೊಟಾನಿಕಲ್ ಗಾರ್ಡನ್ ಮತ್ತು ತಿಜುಕಾ ಅರಣ್ಯವನ್ನು ಹೇಗೆ ರಕ್ಷಣೆ ಮಾಡುತ್ತಾರೆ ಎಂಬ ಬಗ್ಗೆ ವರದಿ ಸಲ್ಲಿಸಲು 4 ವರ್ಷಗಳ ಕಾಲ ಸಮಯ ನೀಡಲಾಗಿತ್ತು. ಹೀಗಾಗಿ ಈ ವರ್ಷ ವಿಶ್ವ ಪಾರಂಪರಿಕ ತಾಣದ ಪಟ್ಟಿಯಲ್ಲಿ ರಿಯೊದ ಹೆಸರು ಅಧಿಕೃತವಾಗಿ ಸೇರಿಕೊಂಡಿದೆ. ರಿಯೋ ಡಿ ಜನೈರೊ ನಗರ ಮಾರ್ವಲಸ್ ಸಿಟಿ (Marvellous City ) ಎಂಬ ನಿಕ್ ನೇಮ್ ಹೊಂದಿದೆ.

ದೇಶದ ಮೊದಲ ಸ್ವಯಂಪ್ರೇರಿತ ಮಹಿಳಾ ಪೊಲೀಸ್ ಅಭಿಯಾನವನ್ನು ಹರಿಯಾಣದ ಕರ್ನಲ್ ಮತ್ತು ಮಹೇಂದ್ರಘರ್ ಜಿಲ್ಲೆಯಲ್ಲಿ ಆರಂಭಿಸಲಾಗಿದೆ. ಪೊಲೀಸ್ ಮತ್ತು ನಾಗರಿಕ ಜೊತೆ ಸಂಪರ್ಕ ಕೊಂಡಿಯಂತೆ ಇವರು ಕಾರ್ಯನಿರ್ವಹಿಸಲಿದ್ದಾರೆ. ಸ್ವಯಂಪ್ರೇರಿತ ಮಹಿಳಾ ಪೊಲೀಸ್ ಅಭಿಯಾನವನ್ನು ಕೇಂದ್ರ ಗೃಹ ಸಚಿವಾಲಯದ ಸಹಯೋಗದೊಂದಿಗೆ ಪ್ರಾರಂಭಿಸಲಾಗಿದೆ. ಸ್ವಯಂಪ್ರೇರಿತ ಮಹಿಳಾ ಪೊಲೀಸರಿಗೆ ರಾಜ್ಯ ಪೊಲೀಸ್ ಅಧಿಕಾರಿಗಳಿಂದ ತರಭೇತಿ ನೀಡಲಾಗುವುದು.

ಭಾರತ ಮತ್ತು ಮಾಲ್ಡೀವ್ಸ್ ನಡುವಿನ ಜಂಟಿ ಸಮರಭ್ಯಾಸ “EKUVERIN”ನ 7ನೇ ಆವೃತ್ತಿ ಮಾಲ್ಡೀವ್ಸ್ ನ ಲಾಮು ಅಟಾಲ್ ನಲ್ಲಿ ಪ್ರಾರಂಭಗೊಂಡಿತು. ಉಭಯ ದೇಶಗಳ ನಡುವಿನ ಈ ಸಮರಭ್ಯಾಸ 14 ದಿನಗಳ ಕಾಲ ನಡೆಯಲಿದೆ. ಭಯೋತ್ಪಾದನೆ ವಿರುದ್ದ ಕಾರ್ಯಾಚರಣೆ ನಡೆಸುವುದು ಸೇರಿದಂತೆ ಉಭಯ ದೇಶಗಳ ನಡುವೆ ರಕ್ಷಣಾ ಸಂಬಂಧವನ್ನು ಬಲಗೊಳಿಸುವುದು ಈ ಸಮರಭ್ಯಾಸದ ಉದ್ದೇಶವಾಗಿದೆ.

ದೇಶದ ಮೊದಲ ತೃತೀಯ ಲಿಂಗಿ ಶಾಲೆ ಕೇರಳದ ಕೊಚ್ಚಿಯಲ್ಲಿ ಸ್ಥಾಪನೆಯಾಗಲಿದೆ. ತೃತೀಯ ಲಿಂಗಿ ಹಕ್ಕುಗಳ ಹೋರಾಟಗಾರ ಮತ್ತು ಕಲಾವಿದ ಕಲ್ಕಿ ಸುಬ್ರಮಣ್ಯಂ ರವರು ಈ ಶಾಲೆಯನ್ನು ಕೊಚ್ಚಿಯ ಸಹಜ್ ಇಂಟರ್ ನ್ಯಾಷನಲ್ ಸ್ಕೂಲ್ ನಲ್ಲಿ ಸ್ಥಾಪಿಸಲಿದ್ದಾರೆ. ಆರು ಜನ ತೃತೀಯ ಲಿಂಗಿಗಳು ಈ ಶಾಲೆಯನ್ನು ನಡೆಸಲಿದ್ದು, ಹತ್ತು ತೃತೀಯ ಲಿಂಗಿ ಮಕ್ಕಳಿಗೆ ವಿದ್ಯಾಭ್ಯಾಸ ಅವಕಾಶ ಕಲ್ಪಿಸಲಿದ್ದಾರೆ.

ಭಾರತೀಯ ಸ್ಟೇಟ್ ಬ್ಯಾಂಕ್ ನ ಮಾಜಿ ಮ್ಯಾನೇಜಿಂಗ್ ಡೈರೆಕ್ಟರ್ ವಿ ಜಿ ಕಣ್ಣನ್ ರವರು ಭಾರತೀಯ ಬ್ಯಾಂಕ್ಸ್ ಅಸೋಸಿಯೇಶನ್ ನ ನೂತನ ಮುಖ್ಯಕಾರ್ಯನಿರ್ವಾಹಕರಾಗಿ ನೇಮಕಗೊಂಡಿದ್ದಾರೆ. ಎಂ. ವಿ ಟಂಕಸಾಲೆ ಅವರಿಂದ ತೆರವಾಗಿದ್ದ ಸ್ಥಾನಕ್ಕೆ ಕಣ್ಣನ್ ನೇಮಕಗೊಂಡಿದ್ದಾರೆ.

ಭಾರತದ ಪ್ರಸಿದ್ದ ಬ್ಯಾಟ್ಸ್ ವುಮನ್ ಆದ ಸ್ಮೃತಿ ಮಂದನ ರವರು “ಐಸಿಸಿ 2016 ವರ್ಷದ ಮಹಿಳಾ ಕ್ರಿಕೆಟ್ ತಂಡ”ಕ್ಕೆ ಆಯ್ಕೆಯಾಗಿರುವ ಭಾರತದ ಏಕೈಕ ಮಹಿಳಾ ಕ್ರಿಕೆಟ್ ಆಟಗಾರ್ತಿ. ವೆಸ್ಟ್ ಇಂಡೀಸ್ ನ ಸ್ಟಫನಿ ಟೈಲರ್ ಈ ತಂಡದ ನಾಯಕಿ. ಇದೇ ಮೊದಲ ಬಾರಿಗೆ ಐಸಿಸಿ ವರ್ಷದ ಮಹಿಳಾ ಕ್ರಿಕೆಟ್ ತಂಡವನ್ನು ಘೋಷಿಸಿದೆ.