ಸಾಮಾನ್ಯ ಜ್ಞಾನ ಮತ್ತು ಪ್ರಚಲಿತ ವಿದ್ಯಮಾನ ಕ್ವಿಜ್- ಜನವರಿ,4, 2017

ವಿಶ್ವಸಂಸ್ಥೆ 2017ನ್ನು “ಇಂಟರ್ ನ್ಯಾಷನಲ್ ಇಯರ್ ಆಫ್ ಸಸ್ಟೈನಬಲ್ ಟೂರಿಸಂ ಫಾರ್ ಡೆವಲಪ್ ಮೆಂಟ್ (International Year of Sustainable Tourism for Development)’ ಎಂದು ಘೋಷಿಸಿದೆ. ಈ ಸಂಬಂಧ ಡಿಸೆಂಬರ್ 4 ರಂದು ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ನಿರ್ಣಯವನ್ನು ಕೈಗೊಳ್ಳಲಾಗಿದೆ.

ಚಿತ್ವಾನ್ ನೇಪಾಳದ ಪ್ರಥಮ ರಾಷ್ಟ್ರೀಯ ಉದ್ಯಾನವಾಗಿದ್ದು 1973 ರಲ್ಲಿ ಸ್ಥಾಪಿಸಲಾಗಿದೆ, 1984 ರಲ್ಲಿ ಸದರಿ ಉದ್ಯಾನಕ್ಕೆ ವಿಶ್ವ ಪಾರಂಪರಿಕ ತಾಣದ ಸ್ಥಾನಮಾನ ದೊರೆತಿತ್ತು. ಈ ರಾಷ್ಟ್ರೀಯ ಉದ್ಯಾನದಲ್ಲಿ ಕೊಂಬುಳ್ಳ ಘೇಂಡಾಮೃಗ, ಬಂಗಾಳದ ಹುಲಿ ಮತ್ತು ವಿಶಿಷ್ಟ ಜಾತಿಯ ಮೊಸಳೆ ಇರುವ ಖ್ಯಾತಿ ಹೊಂದಿದೆ. ಇತ್ತೀಚೆಗೆ ತನ್ನ ಪ್ರವಾಸೋದ್ಯಮವನ್ನು ಪ್ರೋತ್ಸಾಹಿಸಲು ‘ಚಿತ್ವಾನ್ ಆನೆ ಉತ್ಸವ’ ಕಾರ್ಯಕ್ರಮವನ್ನು ಆಯೋಜಿಸಿತ್ತು.

ನಾರ್ವೆ ದೇಶವು ತನ್ನ ದೇಶದ ಎಲ್ಲಾ ಎಫ್.ಎಂ. (FM) ರೇಡಿಯೋ ಸಂಪರ್ಕವನ್ನು ಜನವರಿ 11, 2017 ರಿಂದ ಸ್ಥಗಿತಗೊಳಿಸಲು ನಿರ್ಧರಿಸಿದೆ. ತನ್ನ ನಿರ್ಧಾರದಿಂದ ರಾಷ್ಟ್ರೀಯ ರೇಡಿಯೋ ಚಾನೆಲ್ ಗೆ ಹೆಚ್ಚಿನ ಆದಾಯ ಹರಿದುಬರಲಿದ್ದು, ಡಿಜಿಟಲ್ ತಂತ್ರಜ್ಞಾನಕ್ಕೆ ಹೆಚ್ಚಿನ ಪ್ರೋತ್ಸಾಹ ದೊರೆಯಲಿದೆ ಎಂಬುದು ಸರ್ಕಾರದ ಅಭಿಪ್ರಾಯವಾಗಿದೆ.

ಬೆಂಗಳೂರಿನಲ್ಲಿ ಪ್ರವಾಸಿ ಭಾರತೀಯ ದಿವಸದ 14 ನೇ ಆವೃತ್ತಿ ಜನವರಿ 7 ರಿಂದ 9, 2017ರವರೆಗೂ ಆಯೋಜಿಸಲಾಗಿದೆ. ಭಾರತೀಯ ಸಂಜಾತ ಪೋರ್ಚುಗಲ್ ಪ್ರಧಾನಿ ಡಾ.ಅಂಟೋನಿಯೊ ಕೋಸ್ಟಾ ಮುಖ್ಯ ಅತಿಥಿಯಾಗಿರಲಿದ್ದಾರೆ. ಮಹಾತ್ಮ ಗಾಂಧಿ ಯವರು ದಕ್ಷಿಣ ಆಫ್ರಿಕಾದಿಂದ ಭಾರತಕ್ಕೆ ಮರಳಿದ ನೆನಪಿಗಾಗಿ ಪ್ರತಿವರ್ಷ ಜನವರಿ 9 ನ್ನು ಕೇಂದ್ರ ಸರ್ಕಾರ ಪ್ರವಾಸಿ ಭಾರತೀಯ ದಿವಸವನ್ನಾಗಿ ಆಚರಿಸಲಾಗುತ್ತಿದೆ.

ದೆಹಲಿ ಸರ್ಕಾರ “ಗುಡ್ ಸಮಾರಿಟನ್ ಪಾಲಿಸಿ” (Good Samaritan Policy) ಎಂಬ ಯೋಜನೆಯನ್ನು ಜಾರಿಗೊಳಿಸಿದೆ, ಈ ಯೋಜನೆಯಡಿ ರಸ್ತೆ ಅಪಘಾತದಲ್ಲಿ ತೊಂದರೆಗೀಡಾದ ಸಂತ್ರಸ್ತರಿಗೆ/ಗಾಯಾಳುಗಳಿಗೆ ನೆರವು ನೀಡಿದವರಿಗೆ ರೂ. 2000-00 ಗಳ ಪ್ರೋತ್ಸಾಹ ಧನ ಮತ್ತು ಪ್ರಶಂಸನಾ ಪತ್ರ ನೀಡಲು ಉದ್ದೇಶಿಸಲಾಗಿದೆ. ರಸ್ತೆ ಅಪಘಾತ ಸಂದರ್ಭದಲ್ಲಿ ಗಾಯಾಳುಗಳನ್ನು ಆಸ್ಪತ್ರೆಗೆ ದಾಖಲಿಸಲು, ಈ ಮೂಲಕ ಪ್ರಾಣ ರಕ್ಷಣೆ ಮಾಡಲು ಪ್ರೋತ್ಸಾಹಿಸುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಸುರೇಖಾ ಮರಾಂಡಿ ರವರನ್ನು ಬ್ಯಾಂಕಿನ ಕಾರ್ಯಕಾರಿಣಿ ನಿರ್ದೇಶಕರಾಗಿ ನೇಮಕ ಮಾಡಿದೆ. ಮರಾಂಡಿ ರವರು ಗ್ರಾಹಕ ಶಿಕ್ಷಣ ಮತ್ತು ರಕ್ಷಣಾ ಇಲಾಖೆ ಹಾಗೂ ಆರ್ಥಿಕ ಸೇರ್ಪಡೆ ಮತ್ತು ಅಭಿವೃದ್ದಿ ಇಲಾಖೆಯ ವ್ಯವಹಾರಗಳನ್ನು ನೋಡಿಕೊಳ್ಳಲಿದ್ದಾರೆ. ನೇಮಕಾತಿಗೆ ಮುಂಚೆ ಮರಾಂಡಿ ರವರು RBI ನಲ್ಲಿ ಪ್ರಧಾನ ಜನರಲ್ ಮ್ಯಾನೇಜರ್ ಹಾಗೂ ಮುಖ್ಯ ಜಾಗೃತ ಅಧಿಕಾರಿಯಾಗಿ ಮೂರು ವರ್ಷಗಳ ಕಾಲ ಸೇವೆ ಸಲ್ಲಿಸಿದ್ದರು.

ಸರ್ಚ್ ಎಂಜಿಲ್ ಗೂಗಲ್ ಸಂಸ್ಥೆ ಭಾರತೀಯ ಸಣ್ಣ ಉದ್ಯಮದಾರರಿಗೆ “ಡಿಜಿಟಲ್ ಅನ್ ಲಾಕ್ಡ್ (Digital Unlocked)”ಕಾರ್ಯಕ್ರಮವನ್ನು ಆರಂಭಿಸಿದೆ. ಸಣ್ಣ ಮತ್ತು ಮಧ್ಯಮ ಉದ್ಯಮದಾರರಿಗೆ ಆನ್ ಲೈನ್ ನಲ್ಲಿ ಹೇಗೆ ಕಾರ್ಯನಿರ್ವಹಿಸುತ್ತದೆ ಎನ್ನುವುದರ ಬಗ್ಗೆ ತರಭೇತಿಯನ್ನು ನೀಡಿ ಡಿಜಿಟಲ್ ವಾಹಿನಿಗೆ ತರುವುದು ಕಾರ್ಯಕ್ರಮದ ಗುರಿ. ಈ ಆನ್ ಲೈನ್ ತರಭೇತಿಯು ಒಟ್ಟು 90 ತರಭೇತಿ ವಿಡಿಯೋ ಹಾಗೂ ಎಂಟು ಗಂಟೆ ಕ್ಲಾಸ್ ರೂಂ ತರಭೇತಿಯನ್ನು ಒಳಗೊಂಡಿರಲಿದೆ.

ಹಿಮಾಚಲ ಪ್ರದೇಶದಲ್ಲಿ 13ನೇ ರಾಷ್ಟ್ರೀಯ ಐಸ್ ಸ್ಕೇಟಿಂಗ್ ಚಾಂಪಿಯನ್ ಷಿಪ್ ಜನವರಿ 5 ರಿಂದ ನಡೆಯಲಿದೆ. ಸುಮಾರು 300ಕ್ಕೂ ಹೆಚ್ಚು ಸ್ಪರ್ಧಾರ್ಥಿಗಳು ಈ ಚಾಂಪಿಯನ್ ಷಿಪ್ ನಲ್ಲಿ ಭಾಗವಹಿಸಲಿದ್ದಾರೆ.