ಸಾಮಾನ್ಯ ಜ್ಞಾನ ಮತ್ತು ಪ್ರಚಲಿತ ವಿದ್ಯಮಾನ ಕ್ವಿಜ್- ಫೆಬ್ರವರಿ ,3,4,2017

ವೃತ್ತಿ ತೆರಿಗೆ ಇಲಾಖೆಯು ಭಾರತದಲ್ಲಿ ನೋಟ್ ಅಮಾನ್ಯೀಕರಣದ ನಂತರದ ಅಕ್ರಮ ಹಣ ಜಮಾವಣೆಯನ್ನು ಕಂಡುಹಿಡಿಯುವ ಸಲುವಾಗಿ, ಅಂದರೆ ನವಂಬರ್ 9 ರಿಂದ ಡಿಸಂಬರ್ 30 ರವರೆಗಿನ ದೊಡ್ಡ ಮೊತ್ತದ ಬ್ಯಾಂಕ್ ಜಮೆಯನ್ನು ಪರೀಕ್ಷಿಸುವ ಸಲುವಾಗಿ ‘ಆಪರೇಷನ್ ಕ್ಲೀನ್ ಮನಿ’ ಕಾರ್ಯಚರಣೆಯನ್ನು ಪ್ರಾರಂಭಿಸಿದೆ. ಮೊದಲ ಹಂತದಲ್ಲಿ ಸುಮಾರು 18 ಲಕ್ಷ ಬ್ಯಾಂಕ್ ಖಾತೆಗಳನ್ನು ಪರಿಶೀಲಿಸಲಿದ್ದಾರೆ.

ಸೇಂಟ್ ಪೀಟರ್ಸ್ ಬರ್ಗ್ ಅಂತರರಾಷ್ಟ್ರೀಯ ಆರ್ಥಿಕ ವಿಚಾರ ವೇದಿಕೆ 2017 ನ ಗೌರವಾನ್ವಿತ ಅತಿಥಿ ರಾಷ್ಟ್ರವಾಗಿ ಭಾರತವನ್ನು ಆಹ್ವಾನಿಸಲಾಗಿದೆ. ರಷ್ಯಾದ ಸೆಂಟ್ ಪೀಟರ್ಸ್ ಬರ್ಗ್ ನಲ್ಲಿ ಜೂನ್ 1 ರಿಂದ 3, 2017 ರವರೆಗೆ ಈ ಕಾರ್ಯಕ್ರಮ ನಡೆಯಲಿದ್ದು, ಪ್ರಧಾನಿ ಮೋದಿ ಅವರು ಅತಿಥಿಯಾಗಿ ಭಾಗವಹಿಸಲಿದ್ದಾರೆ.

ವಿಶ್ವ ತೇವಭೂಮಿ ದಿನವನ್ನು ಪ್ರತಿವರ್ಷ ಫೆಬ್ರವರಿ 2 ರಂದು ಆಚರಿಸಲಾಗುತ್ತದೆ. ತೇವಭೂಮಿ ಸಂರಕ್ಷಣೆ ಒಪ್ಪಂದವನ್ನು ಫೆಬ್ರವರಿ 2, 1971 ರಲ್ಲಿ ಇರಾನಿನ ರಾಮಸರ್ ನಗರದಲ್ಲಿ ಅಳವಡಿಸಿಕೊಂಡರ ಸ್ಮರಣಾರ್ಥ ಈ ದಿನದಂದು ವಿಶ್ವ ತೇವಭೂಮಿ ದಿನವನ್ನು ಆಚರಿಸಲಾಗುತ್ತದೆ. 2017 ವಿಶ್ವ ತೇವಭೂಮಿ ದಿನವನ್ನು ಈ ಬಾರಿ ಮಧ್ಯ ಪ್ರದೇಶ ಸರ್ಕಾರದ ಸಹಯೋಗದೊಂದಿಗೆ ಭೋಜ್ ತೇವಭೂಮಿ ಪ್ರದೇಶದಲ್ಲಿ ಆಚರಿಸಲಾಗುತ್ತಿದೆ. ಭೋಜ್ ತೇವಭೂಮಿ ಪ್ರದೇಶ ಭಾರತದ 26 ರಾಮಸರ್ ತೇವಭೂಮಿ ಪ್ರದೇಶಗಳಲ್ಲಿ ಒಂದಾಗಿದೆ. Wetlands for Disaster Risk Reduction ಇದು ಈ ವರ್ಷದ ಧ್ಯೇಯವಾಕ್ಯ.

ಐಡಿಎಫ್ ಸಿ ಬ್ಯಾಂಕಿನ ಸಿಇಓ ಆಗಿರುವ ವಿಕ್ರಂ ಲಿಮೆಯೆ ಅವರು ನ್ಯಾಷನಲ್ ಸ್ಟಾಕ್ ಎಕ್ಸ್ಚೇಂಜ್ ನ ನೂತನ ಸಿಇಓ ಹಾಗೂ ಎಂಡಿ ಯಾಗಿ ನೇಮಕಗೊಂಡಿದ್ಧಾರೆ. ಚಿತ್ರಾ ರಾಮಕೃಷ್ಣ ಅವರು ದಿಡೀರ್ ರಾಜೀನಾಮೆ ನೀಡಿದ ಕಾರಣ ಈ ಸ್ಥಾನ ತೆರವಾಗಿತ್ತು.

ಭಾರತೀಯ ಕರಾವಳಿ ತೀರಾ ಪಡೆ ದಿನವನ್ನು ಪ್ರತಿ ವರ್ಷ ಫೆಬ್ರವರಿ 1 ರಂದು ಆಚರಿಸಲಾಗುತ್ತದೆ. ಕರಾವಳಿ ತೀರಾ ಪಡೆಯನ್ನು ಫೆಬ್ರವರಿ 1, 1977 ರಂದು ಸ್ಥಾಪಿಸಲಾಯಿತು. ಅದರ ಸ್ಮರಣಾರ್ಥ ಫೆಬ್ರವರಿ 1 ರಂದು ಕರಾವಳಿ ತೀರಾ ಪಡೆ ದಿನವನ್ನು ಆಚರಿಸಲಾಗುತ್ತಿದೆ.

ಲೆಫ್ಟಿನೆಂಟ್ ಜನರಲ್ ಸುರೇಶ್ ಶರ್ಮಾ ಅವರು ಭಾರತೀಯ ಸೇನೆಯ ನೂತನ “ಎಂಜನಿಯರ್-ಇನ್-ಚೀಫ್” ಆಗಿ ನೇಮಕಗೊಂಡಿದ್ದಾರೆ. ಸೇನೆಯ ಎಂಜನಿಯರ್ ಸೇವೆಗಳಿಗೆ ಸಂಬಂಧಿಸಿದಂತೆ ಭೂ ಸೇನೆ, ವಾಯು ಸೇನೆ ಹಾಗೂ ನೌಕ ಸೇನೆ ಮುಖ್ಯಸ್ಥರಿಗೆ ಸಲಹೆಗಾರರಾಗಿ ಕಾರ್ಯನಿರ್ವಹಿಸಲಿದ್ದಾರೆ.

ಬಿಹಾರ ರಾಜ್ಯ ಸರ್ಕಾರ ಶಾಲಾ ಪರೀಕ್ಷೆಗಳಲ್ಲಿ ತೃತೀಯ ಲಿಂಗಿ ವಿಭಾಗವನ್ನು ಪರಿಚಯಿಸಿದೆ. 2014 ರಲ್ಲಿ ಸುಪ್ರೀಂ ಕೋರ್ಟ್ ಮಂಗಳಮುಖಿಯನ್ನು ತೃತೀಯ ಲಿಂಗಿಗಳೆಂದು ಪರಿಗಣಿಸುವಂತೆ ನೀಡಿದ ಆದೇಶದ ಅನ್ವಯ ಈ ನಿರ್ಣಯವನ್ನು ಕೈಗೊಳ್ಳಲಾಗಿದೆ.

ಲಕ್ಷ್ಯ ಸೇನ್ ಭಾರತದ ಉದಯೋನ್ಮಖ ಬ್ಯಾಡ್ಮಿಂಟನ್ ಆಟಗಾರ. ಇತ್ತೀಚೆಗೆ ಬಿಡುಗಡೆಗೊಂಡ ಬ್ಯಾಡ್ಮಿಂಟನ್ ವರ್ಲ್ದ್ ಫೆಡರೇಷನ್ ಶ್ರೇಯಾಂಕದಲ್ಲಿ ಸೇನ್ ವಿಶ್ವದ ನಂ.1 ಜೂನಿಯನ್ ಬ್ಯಾಡ್ಮಿಂಟನ್ ಆಟಗಾರರಾಗಿ ಹೊರಹೊಮ್ಮಿದ್ದಾರೆ.

ಪ್ರತಿ ವರ್ಷ ಫೆಬ್ರವರಿ 4 ರಂದು ವಿಶ್ವ ಕ್ಯಾನ್ಸರ್ ದಿನವನ್ನು ಆಚರಿಸಲಾಗುತ್ತದೆ. “ವಿ ಕೆನ್ ಐ ಕೆನ್” ಇದು ಈ ವರ್ಷ ಕ್ಯಾನ್ಸರ್ ದಿನದ ಧ್ಯೇಯವಾಕ್ಯ.