ಸಾಮಾನ್ಯ ಜ್ಞಾನ ಮತ್ತು ಪ್ರಚಲಿತ ವಿದ್ಯಮಾನ ಕ್ವಿಜ್- ಮಾರ್ಚ್,11,12,2017

ಭಾರತ-ಪಾಕಿಸ್ತಾನ ದೇಶದ ಗಡಿಯಲ್ಲಿ ಸುರಕ್ಷತೆ ಹೆಚ್ಚಿಸಲು ಮತ್ತು ಪ್ರಸ್ಥಾವಿತ ತಂತಿ ಬೇಲಿಯ ಸಾಧಕ-ಬಾಧಕಗಳನ್ನು ಅಧ್ಯಯನ ನಡೆಸಲು ಕೇಂದ್ರ ಸರ್ಕಾರ ಮಧುಕರ್ ಗುಪ್ತ ಅಧ್ಯಕ್ಷತೆಯಲ್ಲಿ ಸಮಿತಿಯನ್ನು ರಚಿಸಿತ್ತು. ಸದ್ಯ ಈ ಸಮಿತಿ ತನ್ನ ವರದಿಯನ್ನು ಕೇಂದ್ರ ಸರ್ಕಾರಕ್ಕೆ ಸಲ್ಲಿಸಿದೆ. ಗಡಿ ಸಂರಕ್ಷಣೆಯಲ್ಲಿ ಮೂಲಭೂತ ಸೌಕರ್ಯ, ತಾಂತ್ರಿಕ ಮತ್ತು ಆಡಳಿತಾತ್ಮಕ ಸಮಸ್ಯಗಳು, ಗಡಿಯಲ್ಲಿ ಸೈನ್ಯದ ಜಮಾವಣೆ ಮತ್ತು ಗಡಿ ರಕ್ಷಣೆಯಲ್ಲಿ ಉದ್ಭವವಾಗುವಂತ ಸಮಸ್ಯಗಳ ಬಗ್ಗೆ ಸಮಿತಿ ದೀರ್ಘವಾದ ವರದಿ ನೀಡಿದೆ.

ಉದ್ಯೋಗದಲ್ಲಿ ಆರೋಗ್ಯ ಮತ್ತು ರಕ್ಷಣೆ ಬಗ್ಗೆ “ಅಂತರರಾಷ್ಟ್ರೀಯ ವಿಷನ್ ಜೀರೋ” ಸಮ್ಮೇಳನವನ್ನು ದೆಹಲಿಯಲ್ಲಿ ಆಯೋಜಿಸಲಾಗಿತ್ತು. ಉದ್ಯೋಗದ ಸ್ಥಳದಲ್ಲಿ ಆರೋಗ್ಯ ಮತ್ತು ರಕ್ಷಣೆ ಉತ್ತೇಜಿಸುವ ಸಲುವಾಗಿ ಈ ಸಮ್ಮೇಳನದಲ್ಲಿ ಮಾಹಿತಿ ವಿನಿಮಯ ಮತ್ತು ಅನುಭವ ಹಂಚಿಕೊಳ್ಳಲು ವೇದಿಕೆಯಾಗಿದೆ.

ತಮಿಳುನಾಡಿನ ಎಐಎಡಿಎಂಕೆ ಯ ಮಾಹಿತಿ ತಂತ್ರಜ್ಞಾನ ಅಂಗ ಸಂಸ್ಥೆ ಮಹಿಳೆಯರ ಸುರಕ್ಷತೆಗಾಗಿ “ಅಮ್ಮಾವಿನ್ ಆರನ್” (Ammavin Aran) ಎಂಬ ರಕ್ಷಣಾ ಆ್ಯಪ್ ನ್ನು ಪ್ರಾರಂಭಿಸಿದೆ. ಈ ಆ್ಯಪ್ ನಲ್ಲಿ ಬಳಕೆದಾರರಿಗೆ ಹತ್ತಿರದ ಆರಕ್ಷಕ ಠಾಣೆಯ ಮತ್ತು ಆಸ್ಪತ್ರೆ ದೂರವಾಣಿ ಸಂಖ್ಯೆ ಮತ್ತು ಭೂಪಟದ ಮಾಹಿತಿ ನೀಡುತ್ತದೆ. ಯಾವುದೇ ಅಹಿತಕರ ಸನ್ನಿವೇಶದಲ್ಲಿ ದೊಡ್ಡದಾದ ಶಬ್ಧ ಮಾಡುವ ವ್ಯವಸ್ಥೆಯನ್ನು ಈ ಆ್ಯಪ್ ನಲ್ಲಿ ಕಲ್ಪಿಸಲಾಗಿದೆ.

ಮಹಿಳಾ ಉದ್ಯಮಿಗಳಿಗೆ ಬಂಡವಾಳ ಒದಗಿಸುವ ಸಲುವಾಗಿ ರೂ. 10 ಕೋಟಿಯ Idea2POC ಎಂಬ ಅನುದಾನ ವ್ಯವಸ್ಥೆಯನ್ನು ಕರ್ನಾಟಕ ರಾಜ್ಯ ಸರ್ಕಾರ ಪ್ರಾರಂಭಿಸಿದೆ. ಈ ಯೋಜನೆಯಡಿ ಮಾಹಿತಿ ಮತ್ತು ತಂತ್ರಜ್ಞಾನ ಇಲಾಖೆ, ಬಯೋಟೆಕ್ನಾಲಜಿ ಮತ್ತು ವಿಜ್ಞಾನ-ತಂತ್ರಜ್ಞಾನ ಇಲಾಖೆ ರೂ. 50 ಲಕ್ಷದವರೆಗೆ ಹೊಸ ಅನ್ವೇಷಣೆ ಕೈಗೊಳ್ಳುವ ಮಹಿಳಾ ಉದ್ಯಮಿಗಳಿಗೆ ಅನುದಾನ ಒದಗಿಸಲಿದೆ.

ಅರುಣಾಚಲ ಪ್ರದೇಶ ರಾಜ್ಯ ಸರ್ಕಾರ ಗ್ರಾಮೀಣ ಬಡ ಜನರಿಗಾಗಿ “ಆದರ್ಶ್ ಗ್ರಾಮ ಯೋಜನೆ” ಎಂಬ ಹೊಸ ಯೋಜನೆಯನ್ನು ಪ್ರಾರಂಭಿಸಿದೆ. ತನ್ನ ರಾಜ್ಯದ ಗ್ರಾಮೀಣ ಭಾಗದ ಬಡ ಜನರ ಕಲ್ಯಾಣ ಈ ಯೋಜನೆಯ ಮೂಲ ಉದ್ದೇಶ. 2017-18 ರಲ್ಲಿ ಸುಮಾರು 123 ಗ್ರಾಮಗಳನ್ನು ಆದರ್ಶ ಗ್ರಾಮಗಳನ್ನಾಗಿ ಪರಿವರ್ತಿಸುವುದು ಈ ಯೋಜನೆಯ ಧ್ಯೇಯವಾಗಿದೆ. ಗ್ರಾಮೀಣ ಮೂಲಸೌಕರ್ಯ ಅಭಿವೃದ್ಧಿ, ಉದ್ಯೋಗ ಅವಕಾಶ ಮತ್ತು ಸಮುದಾಯ ಆಸ್ತಿ ನಿರ್ಮಾಣ ಮಾಡುವುದಕ್ಕಾಗಿ ಸುಮಾರು ರೂ. 93 ಕೋಟಿಗಳನ್ನು ಮೀಸಲಿರಿಸಿದೆ.

ಹಿಮಾಚಲ ಪ್ರದೇಶದ ಶಿಮ್ಲಾ ನಗರದ ಸಂಜೋಲಿ ಪೊಲೀಸ್ ಠಾಣೆ ದೇಶವ್ಯಾಪಿ ಆನ್ ಲೈನ್ ವ್ಯವಸ್ಥೆಯಾದ “Crime and Criminal Tracking Network & Systems (CCTNS)” ನೊಂದಿಗೆ ಸಂಪರ್ಕ ಹೊಂದಿದ ಭಾರತದ ಪ್ರಪ್ರಥಮ ಪೊಲೀಸ್ ಠಾಣೆಯಾಗಿದೆ. ಈ ವ್ಯವಸ್ಥೆಯಡಿ ಸಾರ್ವಜನಿಕರು ಆನ್ ಲೈನ್/ಆಫ್ ಲೈನ್ ಮುಖೇನ ದೂರು ದಾಖಲಿಸಲು, ಉದ್ಯೋಗಾಕಾಂಕ್ಷಿಗಳ ಪೊಲೀಸ್ ಸತ್ಯಾಪನೆ ಮಾಡಲು, ಬಾಡಿಗೆದಾರರ ನಡವಳಿ ಪ್ರಮಾಣಪತ್ರ ಪಡೆಯಲು ಬಳಸಬಹುದಾಗಿದೆ.